Uncategorized
ಕಣ್ಣೀರು ತರಿಸುತ್ತೆ ಈ ಅನಾಥ ಹೆಣ್ಣುಮಗಳ ಕಥೆ: ವರ್ಷದ ಬಳಿಕ ಅರಣ್ಯದಲ್ಲಿ ಸಿಕ್ಕಿತು ಸೂಟ್ಕೇಸ್ ಮಿಸ್ಟರಿ!
ಕಣ್ಣೀರು ತರಿಸುತ್ತೆ ಈ ಅನಾಥ ಹೆಣ್ಣುಮಗಳ ಕಥೆ: ವರ್ಷದ ಬಳಿಕ ಅರಣ್ಯದಲ್ಲಿ ಸಿಕ್ಕಿತು ಸೂಟ್ಕೇಸ್ ಮಿಸ್ಟರಿ!
ಒಂದು ಕಡೆ ಹೆತ್ತ ತಾಯಿಯಿಲ್ಲದ ಅನಾಥಪ್ರಜ್ಞೆ, ಇನ್ನೊಂದು ಕಡೆ ಅಪ್ಪನ ವಿಪರೀತ ಕುಡಿತ. ಈ ನರಕಯಾತನೆಗೆ ಬೇಸತ್ತು, ತನ್ನ ಬದುಕನ್ನು ತಾನೇ ಕಟ್ಟಿಕೊಳ್ಳಬೇಕು ಎಂದು 8ನೇ ತರಗತಿಗೇ ಓದು ನಿಲ್ಲಿಸಿ ಪಟ್ಟಣಕ್ಕೆ ಬಂದಿದ್ದಳು ಆ 14 ವರ್ಷದ ಬಾಲಕಿ ಸಂಗೀತಾ. ಆದರೆ, ಆಕೆ ಕಂಡ ಬದುಕಿನ ಕನಸುಗಳು ವರ್ಷದ ನಂತರ ಸೂಟ್ಕೇಸ್ನಲ್ಲಿ ಮೂಳೆ ಮತ್ತು ತಲೆಬುರುಡೆಯಾಗಿ ಪತ್ತೆಯಾಗುತ್ತವೆ ಎಂದು ಯಾರೂ ಊಹಿಸಿರಲಿಲ್ಲ!
ಶಿವಮೊಗ್ಗ ಜಿಲ್ಲೆಯ ಶಿಕಾರಿಪುರದ ತರಲಘಟ್ಟದಲ್ಲಿ ನಡೆದ ಈ ಭೀಕರ ಘಟನೆ ಇಡೀ ಸಮಾಜವನ್ನೇ ಬೆಚ್ಚಿಬೀಳಿಸಿದೆ.
ಆಸರೆಯ ನೆರಳಿನಲ್ಲಿ ಅಡಗಿದ್ದ ಕರಾಳತೆ:ಕುಡುಕ ತಂದೆಯಿಂದ ದೂರವಾಗಿ ಶಿಕಾರಿಪುರಕ್ಕೆ ಕೆಲಸ ಹುಡುಕಿಕೊಂಡು ಬಂದ ಬಾಲಕಿಗೆ ಸೌಭಾಗ್ಯ ಎಂಬಾಕೆಯ ಪರಿಚಯವಾಗಿತ್ತು. ಆಸರೆ ನೀಡುವುದಾಗಿ ನಂಬಿಸಿ ಆಕೆಯನ್ನು ಪಿಜಿಯಲ್ಲಿ ಇರಿಸಿಕೊಳ್ಳಲಾಗಿತ್ತು. ಆದರೆ, ಕಳೆದ ವರ್ಷ (ಮೇ 18, 2025) ಪಿಜಿಯಲ್ಲಿದ್ದ ಗಂಗಾ ನಾಯ್ಕ್, ಸೌಭಾಗ್ಯ ಮತ್ತು ರಂಜಿತಾ ಎಂಬುವವರ ಜೊತೆ ಸಂಗೀತಾಗೆ ಯಾವುದೋ ವಿಷಯಕ್ಕೆ ಗಲಾಟೆಯಾಗಿದೆ. ಆ ಘಟನೆಯ ನಂತರ ಬಾಲಕಿ ನಿಗೂಢವಾಗಿ ನಾಪತ್ತೆಯಾಗಿದ್ದಳು. ತಂದೆ ತಡವಾಗಿ ನಾಪತ್ತೆ ದೂರು ದಾಖಲಿಸಿದ್ದರು.
ಬಾತ್ರೂಮ್ ಸಾವಿನ ಸುತ್ತ ಹೆಣೆದ ಮಾಸ್ಟರ್ ಪ್ಲಾನ್!ಕಳೆದೊಂದು ವರ್ಷದಿಂದ ತನಿಖೆ ನಡೆಸುತ್ತಿದ್ದ ಶಿವಮೊಗ್ಗ ಪೊಲೀಸರು ಆರೋಪಿಗಳಿಗೆ ಬಿಸಿ ಮುಟ್ಟಿಸಿದಾಗ ಅಸಲಿ ಕಹಾನಿ ಬಿಚ್ಚಿಬಿದ್ದಿದೆ. ಆರೋಪಿಗಳ ಹೇಳಿಕೆಯ ಪ್ರಕಾರ:
ಅಂದು ಪಿಜಿಯಲ್ಲಿ ಗಲಾಟೆಯಾದ ಬೆನ್ನಲ್ಲೇ ಸಂಗೀತಾ ಬಾತ್ರೂಮ್ನಲ್ಲಿ ಆತ್ಮಹತ್ಯೆ ಮಾಡಿಕೊಂಡಿದ್ದಳಂತೆ.
ಎಲ್ಲಿ ತಮ್ಮ ಮೇಲೆ ಪೊಲೀಸ್ ಕೇಸ್ ಆಗುತ್ತದೋ ಎಂದು ಹೆದರಿದ ಆರೋಪಿಗಳು, ಶವವನ್ನು ಯಾರಿಗೂ ತಿಳಿಯದಂತೆ ಸೂಟ್ಕೇಸ್ನಲ್ಲಿ ತುಂಬಿದ್ದಾರೆ.
ಬಳಿಕ ಕಾರಿನಲ್ಲಿ ತೆಗೆದುಕೊಂಡು ಹೋಗಿ ಉತ್ತರ ಕನ್ನಡ ಜಿಲ್ಲೆಯ ಸಿದ್ದಾಪುರ ಸಮೀಪದ ಮಾವಿನಗುಂಡಿ ಅರಣ್ಯ ಪ್ರದೇಶಕ್ಕೆ ಎಸೆದು ಬಂದಿದ್ದಾರೆ!
ಕಟುಕರಿಗೆ ಕಾನೂನಿನ ಶಿಕ್ಷೆ:ಪ್ರಕರಣದ ಬೆನ್ನಟ್ಟಿದ ಶಿವಮೊಗ್ಗ ಎಸ್ಪಿ ಬಿ. ನಿಖಿಲ್ ನೇತೃತ್ವದ ಪೊಲೀಸ್ ತಂಡ, ಆರೋಪಿಗಳನ್ನು ಮಾವಿನಗುಂಡಿ ಅರಣ್ಯಕ್ಕೆ ಕರೆದೊಯ್ದು ಸ್ಥಳ ಮಹಜರು ನಡೆಸಿದೆ. ಅಲ್ಲಿ ಕೇವಲ ಬಾಲಕಿಯ ಅಸ್ಥಿಪಂಜರದ ಅವಶೇಷಗಳು ಮಾತ್ರ ಪತ್ತೆಯಾಗಿವೆ.
ಚಿಂತಿಸಬೇಕಾದ ಸಂಗತಿ: ತಪ್ಪು ಯಾರದ್ದೇ ಇರಲಿ, ಒಂದು ಜೀವ ಹೋದಾಗ ಕಾನೂನಿಗೆ ಹೆದರಿ ಅದನ್ನು ಮರೆಮಾಚಲು ಹೋದ ಈ ಕೃತ್ಯ ನಿಜಕ್ಕೂ ಅಮಾನವೀಯ. ಬದುಕಿ ಸಾಧಿಸಬೇಕಾಗಿದ್ದ ಹೆಣ್ಣುಮಗಳು ಇಂದು ಅರ್ಧ ಹಾದಿಯಲ್ಲೇ ಹೆಣವಾಗಿದ್ದಾಳೆ.
ಇದಕ್ಕೆ ಕಾರಣರಾದವರಿಗೆ ಕಠಿಣ ಶಿಕ್ಷೆಯಾಗಲಿ.
