Uncategorized
ನಿಸ್ವಾರ್ಥ ಸೇವೆಗೆ ಒಲಿದ ಕೋಟಿ ಆಸ್ತಿ: ಗಾಯಕಿ ಎಸ್. ಜಾನಕಿ ಸಾಕುಮಗನಿಗೆ ಸಿಕ್ಕಿತು ವಿಲ್ ಭಾಗ್ಯ!
ಮೈಸೂರು: “ನಿಸ್ವಾರ್ಥ ಸೇವೆಯ ಫಲ ಯಾವಾಗಲೂ ವ್ಯರ್ಥವಾಗುವುದಿಲ್ಲ, ಅದು ಅರ್ಹರನ್ನು ತಲುಪೇ ತೀರುತ್ತದೆ” ಎನ್ನುವುದಕ್ಕೆ ಇಲ್ಲೊಂದು ಜ್ವಲಂತ ಮತ್ತು ಭಾವನಾತ್ಮಕ ಉದಾಹರಣೆ ಸಿಕ್ಕಿದೆ. ದಕ್ಷಿಣ ಭಾರತದ ಖ್ಯಾತ ಗಾನಕೋಗಿಲೆ ಎಸ್. ಜಾನಕಿ ಅವರು ತಮ್ಮ ಕೋಟ್ಯಂತರ ರೂಪಾಯಿ ಆಸ್ತಿಯಲ್ಲಿ ಒಂದು ಪಾಲನ್ನು ತಮ್ಮನ್ನು ನೆರಳಿನಂತೆ ಕಾಯ್ದ ಸಾಕುಮಗ ನವೀನ್ ಹೆಸರಿಗೆ ಸದ್ದಿಲ್ಲದೆ ವಿಲ್ (ಮರಣಶಾಸನ) ಬರೆದಿಟ್ಟಿರುವ ಅಪರೂಪದ ಸಂಗತಿಯೊಂದು ಬೆಳಕಿಗೆ ಬಂದಿದೆ.
ಮಗನ ಅಗಲಿಕೆ ಹಾಗೂ ಮೈಸೂರು ವಾಸ:
ತಮ್ಮ ಅಪಾರ ಕಂಠಸಿರಿಯಿಂದ ಕೋಟ್ಯಂತರ ಅಭಿಮಾನಿಗಳನ್ನು ಗಳಿಸಿದ್ದ ಎಸ್. ಜಾನಕಿ ಅವರು, ಮಗ ಮುರುಳಿಕೃಷ್ಣ ಅವರ ಅಕಾಲಿಕ ಸಾವಿನ ನಂತರ ತೀವ್ರವಾಗಿ ವಿಚಲಿತರಾಗಿದ್ದರು. ಮಾನಸಿಕ ನೆಮ್ಮದಿಯನ್ನು ಅರಸುತ್ತಾ ಅವರು ಕೊನೆಗೆ ಆರಿಸಿಕೊಂಡಿದ್ದು ಸಾಂಸ್ಕೃತಿಕ ನಗರಿ ಮೈಸೂರನ್ನು. ಬದುಕಿನ ಕಠಿಣ ದಿನಗಳಲ್ಲಿ ತಮಗೆ ಆಸರೆಯಾಗುವಂತೆ ತಮ್ಮ ಆರಾಧ್ಯ ದೈವ ಕೃಷ್ಣನಲ್ಲಿ ಸದಾ ಪ್ರಾರ್ಥಿಸುತ್ತಿದ್ದ ಜಾನಕಮ್ಮ ಅವರಿಗೆ ಮಗನ ಸ್ಥಾನದಲ್ಲಿ ನಿಂತು ನೆರವಾಗಿದ್ದು ಇದೇ ನವೀನ್.
30 ವರ್ಷಗಳ ನಿಸ್ವಾರ್ಥ ಬಾಂಧವ್ಯ:
ಬಾಲಕನಾಗಿದ್ದಾಗಲೇ ಜಾನಕಮ್ಮ ಅವರ ಧ್ವನಿಗೆ ಮನಸೋತು, ಊರು ಬಿಟ್ಟು ಚೆನ್ನೈಗೆ ಬಂದು ಅವರ ಆಶ್ರಯ ಪಡೆದಿದ್ದಾತ ನವೀನ್. ಕಳೆದ 30 ವರ್ಷಗಳಿಂದ ಜಾನಕಮ್ಮ ಅವರ ಪ್ರತಿಯೊಂದು ಬೇಕು-ಬೇಡಗಳನ್ನು ನೋಡಿಕೊಳ್ಳುತ್ತಾ, ಅವರ ನೆರಳಿನಂತೆ ಜೀವಿಸುತ್ತಿದ್ದಾರೆ. ಜಾನಕಮ್ಮ ಚೆನ್ನೈನಿಂದ ಮೈಸೂರಿಗೆ ವಾಸ್ತವ್ಯ ಬದಲಾಯಿಸಿದಾಗಲೂ ನವೀನ್ ಅವರೊಂದಿಗೇ ಬಂದು ತಮ್ಮ ಸೇವೆಯನ್ನು ಮುಂದುವರಿಸಿದ್ದರು.
ಸಂಬಳವಿಲ್ಲದ ಸೇವೆ:
ವಿಶೇಷವೆಂದರೆ, ಜಾನಕಮ್ಮ ಅವರ ಬಳಿ ಕೋಟ್ಯಂತರ ರೂಪಾಯಿ ಆಸ್ತಿ ಇದ್ದರೂ ನವೀನ್ ಅದಕ್ಕೆ ಎಂದೂ ಆಸೆ ಪಟ್ಟವರಲ್ಲ. ಇಷ್ಟು ದೀರ್ಘಾವಧಿಯ ಸೇವೆಯ ಅವಧಿಯಲ್ಲಿ ಅವರು ಜಾನಕಮ್ಮ ಅವರಿಂದ ಸಂಬಳ ಅಥವಾ ಸಂಭಾವನೆ ರೂಪದಲ್ಲಿ ನಯಾಪೈಸೆ ಹಣವನ್ನೂ ಅಪೇಕ್ಷಿಸಿರಲಿಲ್ಲ. ಅವರ ನಡುವಿನ ಬಾಂಧವ್ಯ ಕೇವಲ ಅಮ್ಮ-ಮಗನ ಸಂಬಂಧವನ್ನು ಮೀರಿದ್ದಾಗಿತ್ತು.
ಗಮನಕ್ಕೆ ತರದೆ ವಿಲ್ ಮಾಡಿದ ಜಾನಕಮ್ಮ:
ತಮ್ಮನ್ನು ಯಾವುದೇ ಸ್ವಾರ್ಥವಿಲ್ಲದೇ ಮಗನಿಗಿಂತ ಹೆಚ್ಚಾಗಿ ನೋಡಿಕೊಳ್ಳುತ್ತಿರುವ ನವೀನ್ನ ಪ್ರಾಮಾಣಿಕತೆ ಜಾನಕಮ್ಮ ಅವರಿಗೆ ಚೆನ್ನಾಗಿ ಗೊತ್ತಿತ್ತು. ಅದಕ್ಕಾಗಿಯೇ ಆತನಿಗೆ ತಿಳಿಸದೆಯೇ ಸದ್ದಿಲ್ಲದೆ ದೊಡ್ಡ ನಿರ್ಧಾರವೊಂದನ್ನು ಕೈಗೊಂಡಿದ್ದಾರೆ. ತರುವಾಯ ತನ್ನ ಕೋಟ್ಯಂತರ ಆಸ್ತಿಯಲ್ಲಿ ಒಂದು ಪಾಲನ್ನು ಸಾಕುಮಗ ನವೀನ್ಗೆ ನೀಡುವಂತೆ ವಿಲ್ ಸಿದ್ಧಪಡಿಸಿದ್ದಾರೆ. ಈ ವಿಷಯ ಸ್ವತಃ ನವೀನ್ ಅವರಿಗೇ ತಿಳಿದಿರಲಿಲ್ಲ ಎನ್ನಲಾಗಿದೆ.
ಯಾವುದೇ ಫಲಾಪೇಕ್ಷೆಯಿಲ್ಲದೆ ಪ್ರಾಮಾಣಿಕವಾಗಿ ಸೇವೆ ಸಲ್ಲಿಸಿದ ನವೀನ್ ಅವರಿಗೆ ಜಾನಕಮ್ಮ ಮಾಡಿರುವ ಈ ಕಾರ್ಯ, ನಿಸ್ವಾರ್ಥ ಸೇವೆಗೆ ಸಂದ ಗೌರವ ಎಂದೇ ಸಾರ್ವಜನಿಕ ವಲಯದಲ್ಲಿ ಶ್ಲಾಘನೆ ವ್ಯಕ್ತವಾಗುತ್ತಿದೆ.
